Bilang parte ng aming pangako sa isang gobyernong tapat, responsable, at mabilis na umaksiyon, nais naming ibahagi ang panlahatang pagsisikap ng pamahalaang lokal, stakeholders, at ng Pasayeños para sa patuloy na paglago at pag-unlad ng ating lungsod.

Ang Lungsod Pasay, bilang tahanan ng maraming hotel, casino, restaurant, pamilihan, at namumukod-tanging convention center sa mundo, ay nag-aambag ng malaking bahagi sa mga gawaing panturismo at iba pang events sa Kalakhang Maynila. Sa gitna ng modernisasyon at pag-unlad ng imprastraktura, nananatili tayong matatag sa ating pangakong magbigay ng mahusay na serbisyo publiko para sa patuloy na pag-unlad ng lungsod, tungo sa kapaligirang nagbibigay-daan para sa progresibo at mas pinalakas na Pasayeños.

Alamin pa ang ilang mga bagay tungkol sa ating minamahal na lungsod - ang profayl nito, transpormasyon, mga serbisyong pampubliko, kultura, at mga atraksiyon. Halina at bisitahin ang Lungsod Pasay at nang maranasan ang aming pambihirang hospitalidad at ang "Tapat Kayong Pinaglilingkuran" na tatak ng serbisyo ng pamahalaang lokal. Tuklasin at lasapin kung bakit ang Lungsod Pasay ay hindi lamang pangunahin at namumukod tanging daan sa paglalakbay ng bansa, kun’di isa mismong destinasyon. Tandaan lamang: "Sa Pasay, bawal ang pasaway."

- Alkalde Imelda “Emi” Calixto-Rubiano